Burcad badeeda Somaalida ah ayaa ku goodiyay dilka lahaystayaal Saaran Markab ku gooshayay calanka Malta oo ay dhowaan afduubteen,iyadoona ay sheegeen in ay dilayaan hadii aanay sida ugu dhakhsiiyaha badan u helin lacagaha madax furashada ah ee ay dalbadeen.

Shaqaalaha saaran Markabka ay Burcad badeedu haystaan ayaa u kala dhashay wadamada Goargia iyo Turkiga,waxaana shaqaalahaasi oo gaaraya 16 ay yihiin kuwo xiligan baqdin ka muujinaya goodinta ay Burcad badeedu jeedinayaan.

Burcad badeeda ayaa talaadadii aynu soo dhaafnay kula xiriiray Eheladii iyo qaraabadii ay kasoo jeedeen shaqaalaha saaran Markabka ay haystaan in ay dilayaan hadii aan sida ugu dhakhsiiyaha badan lacagaha ay dalbadeen aan lagu soo gaarsiin.

Burcad badeeda ayaa u qabtay mulkiilayaasha iyo Ehelada lahaystayaasha mudo 2 maalin ah,iyadoona hadii aanay labadaasi Maalin kusoo gaarsiin lacagaha ay dalbadeen ay sheegeen in ay ku dilayaan.

Lacag 1 Million oo doolar kor u dhaafaysa ayaa Burcad badeeda ka dalbadeen Markabka iyo shaqaalaha saaran,iyadoona aan la ogayn sida ay ku suurta galayso mudo labo maalin ah in lacagtaasi ay ku gaarto.

Mulkiilaha Markabka ay Burcad badeedu saaran yihiin ayaa xiriir uu la sameeyay Burcad badeeda u sheegay in uu bixinayo 350,000 doolar,iyadoona lacagtaas ay Burcad badeedu ganafka ku dhufteen.