| Madaxweyne
C/llaahi Yuusuf Axmed oo dalka dib ugu soo laabtay,
| GololeyOnline: Muqdisho, Axad
11/05/2008 |
Madaxweyne
C/llaahi Yuusuf Axmed iyo wafdi uu hoggaaminayo ayaa maanta dib
ugu soo laabtay magaalada Muqdisho, waxaana Madaxweynaha oo ka soo
degay garoonka diyaaradaha caalamiga ah ee Aadan cadde International
Airport ku soo dhoweeyay xubnaha labada Gole ee Xukuumada Federaalka
KMG ah.
Socdaalka
Madaxweynaha oo saakay saacadaha hore ka soo degay Garoonka Diyaaradaha
ayaa sababay in la xiro dhammaan waddooyinka uu wafdigu soo marayo
oo uu ka mid yahay Isgoyska No.4 ayaa saakay la xiray, waxaana Isgoyskaasi
ku sugnaa ciidamada Dowladda Federaalka iyo kuwa Itoobiyaanka ah
oo daadsanaa ilaa xarunta Madaxtooyada oo fadhi u ah Madaxweyne
C/llaahi Yuusuf Axmed.
Imaatinka
Madaxweynaha iyo wafdigiisa ayaa ku soo beegmay xilli qabanqaabo
loogu jiro shirka dib u heshiisiinta ee la filayo inuu ka dhaco
dalka Jabuuti, iyadoo Madaxweynaha la filayay inuu tago magaalada
Baydhaba si uu ula kulmo Xildhibaanada Baarlamaanka oo wax ka weydiinaya
mooshin ka dhan ah Ra'iisal Wasaare Nuur CAdde, hase yeeshee Madaxweynuhu
uu ka baaqsaday arrintaasi.
Madaxweyne
C/llaahi Yuusuf Axmed ayaa la filayaa inuu ka warbixiyo socdaalkiisa
uu ku tegay dalalka Yurub iyo Afrika, sida kii uu ku tegay dalka
Faransiiska kulana kulmay madaxda dalkaasi, oo ay ka wadahadleen
arrimo dhowr ah, sidoo kale Madaxweynuhu waxa uu ka hadli doonaa
isbedelada siyaasadeed ee ka socda gudaha dalka, dagaalada ka socda
Muqdisho iyo arrimo kale.
Xafiiska Wararka Gololey Online
Muqdisho - Soomaaliya
www.webmaster@gololey.com
Ku Laabo
|
