| Afhayeenka
Ganacsatada Suuqa Maanaboolyo oo ka warbixiyay Kunka shilin &
nabadgelyada Deg. Shibis
| GololeyOnline: Muqdisho, Axad
11/05/2008 |
 Iyadoo
maalmahan ay cirka isku sii shareereysay nabadgelyo darri ka jirta
xaafado ka tirsan Degmada Shibis oo iyadu lagu yaqiin inay tahay
goob ka nabadgelyo badneyd degmooyinka G/Banaadir, kaddib markii
ay qaar ka mid ah xaafadaha Shibis ku soo qamaameen kooxo burcad
ah oo markii gabalku dhaco aad moodo in xarig laga soo furay, kuwaasoo
falal dhac iyo jir dil isugu jira u geysanaya dadka socotada ah.
Haddaba
arrimahaasi si aan wax uga ogaano iyo halka ay ku dambeysay diidmada
lacagta Kunka shilinka Soomaaliga ah ee suuqa Maanaboolyo waxaa
warbixin ku saabsan arrintaasi kala yeelanay Afhayeenka Suuqa Maanaboolyo
Cali Jamiil, isagoo sheegay ugu horeyntii inay meesha ka baxday
diidmada lacagaha shilinka Soomaaliga, isla markaana ganacsatada
suuqa Maanaboolyo ay qaadanayaan lacagaha nooc kasta oo ay tahay,
isagoo sheegay inaan la kala sooceynin Noodka Kunka Shilin ama kii
hore ha ahaado ama kii dambe.
"Waxaan
mahad-naq u jeedinayaa Culumaa'udiinka uu ka mid yahay Sheekh Maxamuud
Aw CAbdulle Cariif, ganacsatadii u ololeysay soo nooleynta Kunka
shilin iyo dadweynihii shucuurtooda ka muujiyay in la diido halkii
Kun ee u haray" ayuu yiri Md. Cali Jamiil afhayeenka Ganacsatada
Suuqa Maanaboolyo oo dhinaca kale sheegay inuu mar kale ammaan gaar
ah u dirayo dhammaan shacabkii Soomaaliyeed ee ka dhiidhiyay in
la marsiiyo qiima-dhac ku yimaada Shilinkooda, gaar ahaan shacabka
ku dhaqan magaalada Muqdisho, oo uu sheegay in markii la arkay midnimadooda
la marsiin waayay wixii la doonayay, "Shacabka Muqdisho waxaan
ugu baaqayaa inay ku dadaalaan had iyo goor midnimadooda, isla markaana
wixii dhib ah ee ka hor yimaada iyagoo mideysan ay shucuurtooda
ku muujiyaan" ayuu yiri Afhayeenka ganacsatada Suuqa Maanaboolyo.
Bartamihii
toddobaadkan ayay ahayd markii kooxo maleeshiyo xiran dareyska ciidamada
Milataarka Soomaaliya ay fal dhac ah ka geysteen xarun Internet
oo ku taala agagaarka Masjidka Rowda, isla markaana uu leeyahay
isla Afhayeenka ganacsatada Maanaboolyo Md. Cali Jamiil, sidaasoo
ay tahay afhayeenka waxaan wax ka weydiinay Maxaa iska bedelay nabadgelyo
xumadii ka jirtay xaafadaha Degmada Shibis qaarkood oo aan la socon
karin markii qorraxdo dhacdo burcad diirato ah oo ku soo qamaameysa
socotada awgeed, wuxuuna ku jawaabay:
"Waa
run in nabadgelyo xumo ka jirto xaafadaha ku dhow laamiga ee Degmada
Shibis, hase yeeshee aniga arrintaasi wax ka qabashadeeda iima taallo,
waayo aniga ciidan ma ahi waxaanse filayaa in iminka lagu baraarugay
baaxadda ay la'eg tahay waxyeelada burcadda, waxaana jira roondo
ay sameeyaan ciidamada Booliska oo runtii wax weyn ka bedelay xaaladii
aan ku sugneyn toddobaadkii aynu soo dhaafnay".
Jabriil Maxamuud Nuur (Jabra)
Xafiiska Wararka Gololey Online
Muqdisho - Soomaaliya
www.webmaster@gololey.com
Ku Laabo
|
